"ಇದನ್ನು ಎಂದೋ ಬರೆಯಬೇಕಿತ್ತು" ಎಂದೆ. ಮುಖದಲ್ಲಿ ನಿರಾಳತೆಯಿರಲಿಲ್ಲ. "ಎಂದೋ" ಹೇಳಿದ್ದರೆ ಇಷ್ಟೊತ್ತಿಗೆ ಕ್ರಾಂತಿಯಾಗಿ ಸುಖಿ ವ್ಯವಸ್ಥೆಯಲ್ಲಿ ಬದುಕಬಹುದಿತ್ತು ಎನ್ನುವುದು ನನ್ನ ಹೇಳಿಕೆಯಾಗಿತ್ತು. ಹೋಗಲಿ ಇಂದಾದರೂ ಹೇಳಿದ್ದೇನಲ್ಲ ಎಂದು ಕೊಳ್ಳಬಹುದಿತ್ತು. ನಾಳೆಯ ಬಗ್ಗೆ ಬೇರೆಯವರಿರಲಿ ನಾನೇ ಗ್ಯಾರಂಟಿ ಕೊಡುವುದಿಲ್ಲ, ಹಾಗಾಗಿ ನಾನು ಕಳೆದ ವರ್ಷ, ನೆನ್ನೆ, ಹಿಂದಿನ ಕ್ಷಣದಲ್ಲಿ ಜೀನಿಯಸ್ ಆಗಿದ್ದೆ. ಈಗ ಮತ್ತು ನಾಳೆ ಮುಂದಿನ ದಿನಗಳಲ್ಲಿ ನಾನು ಮಾಡಿದ ಸಾಲ ಮನ್ನಾ ಆಗುವ ನಿರೀಕ್ಷೆಯ ಸಾಮಾನ್ಯ.
ನಾನು ಹಿಂದಿನ ದಿನಗಳಲ್ಲಿ ತುಂಬಾ ಬರೆದಿದ್ದೆ. ಬರೆದದ್ದನ್ನು ಒಪ್ಪಿದ್ದೆ. ಅದೆಲ್ಲಾ ಓದಿಕೊಂಡಿದ್ದರ ಪರಿಣಾಮವಾಗಿ ಕ್ರಾಂತಿ ನನಗೆ ಸುಲಭವಾಗಿತ್ತು. ನನ್ನ ಸಲಹೆಗಳು ಜಗತ್ತನ್ನು ಬದಲಿಸಿ ಬಿಡುವಷ್ಟು ಪರಿಣಾಮಕಾರಿಯಾಗಿಯೂ ಇದ್ದವು. ನಾನು ಹೇಳುವುದನ್ನು ಕೇಳಿ ಗೌರವದಿಂದ ನನ್ನ ಕಡೆ ನೋಡುತ್ತಿದ್ದರು.ಹೀಗೆ ಎಲ್ಲವೂ ಸರಿಯಾಗಿತ್ತು. ನಾನು ಕೆಲಸ ಅಂತ ಹಿಡಿಯುವವರೆಗೆ. ಈಗ ನನಗೆ ನನ್ನ ಕೆಲಸವಷ್ಟೇ ಮುಖ್ಯವಾಗಿರುವುದರಿಂದ ನನ್ನ ಪರವಾಗಿ ಅಣ್ಣಾ ಹಜಾರೆಯನ್ನು ಉಪವಾಸ ಕೂರಿಸಿದ್ದೇನೆ.
ನಾನು ತುಂಬಾ ಒಳ್ಳೇ ಮನುಷ್ಯನೇನೂ ಆಗಿರಲಿಲ್ಲ. ಏಕೆಂದರೆ ನನಗೆಲ್ಲಾ ಗೊತ್ತಿತ್ತು.. ಯಾರೇ ಆಗಿರಲಿ ತಪ್ಪಿದ್ದರೆ ಝಾಡಿಸುತ್ತಿದ್ದೆ.ನನ್ನ ಮುಂದಿನದೇ ಪ್ರಪಂಚವಾಗಿದ್ದರಿಂದ ತಪ್ಪುಗಳು ನಡೆಯುತ್ತಿರಲಿಲ್ಲ. ಇಪ್ಪತ್ತೇಳನೇ ವಯಸ್ಸು ಖಾಯಂ ಅಲ್ಲವಲ್ಲ. ಹಾಗಾಗಿ ನಾನು ಕೂಡ ಒಳ್ಳೆಯ ಮನುಷ್ಯ. ನನ್ನ ಮುಂದಿನದು ಕ್ಷಣದಲ್ಲಿ ಬದಲಾಗುವ ದೃಶ್ಯ. ಅದು ಪ್ರಪಂಚವಲ್ಲ .ತಪ್ಪುಗಳು ಸಹಜ ಎಂದು ನನ್ನ ಮೂಲಕವೇ ಮತ್ತು ನನ್ನಿಂದಲೇ ತಪ್ಪಗಳಾಗುತ್ತಿವೆ. ಒಳ್ಳೆ ಮನುಷ್ಯನಾದ ಮೇಲೆ ಗಾಂಧಿಯ ಆತ್ಮ ಚರಿತ್ರೆಯನ್ನು ಜತೆಯಲ್ಲಿ ಇಟ್ಟುಕೊಳ್ಳುತ್ತೇನೆ.
ಇದನ್ನೆಲ್ಲಾ ನಿರಾಶಾವಾದ ಅಂದು ಕೊಂಡಿರಾದರೆ ನನ್ನ ಅಭ್ಯಂತರವಿಲ್ಲ. ಯಾಕೆಂದರೆ ನಿಮ್ಮ ಬಗ್ಗೆ ಮರುಕ ಪಡುವಷ್ಟು ಶಕ್ತವಾಗಿದ್ದೇನೆ. ಬೇಕಿದ್ದರೆ ಪಂಥ ಕಟ್ಟಿ ಇದೇ ಆಶಾವಾದ ಎಂದು ನಿಮಗೆ ಮನವರಿಕೆ ಮಾಡುತ್ತೇನೆ. ನೀವೂ ಸಹ ನನ್ನ ದಾರಿಗೆ ಬನ್ನಿ ಯಾಕೆಂದರೆ.....................
ಹಿಂದೆ ನಾನೂ ನಿಮ್ಮ ಹಾದಿಯಲ್ಲಿದ್ದವನೇ.
-ಚಲಂ
ಹಿಂದೆ ನಾನೂ ನಿಮ್ಮ ಹಾದಿಯಲ್ಲಿದ್ದವನೇ.
No comments:
Post a Comment