ಎತ್ತು

ಎತ್ತು ನೇಗಿಲೊತ್ತು ಸಾಗುತ್ತಿದೆ
ಜಗದ ಎಲ್ಲಾ ಭಾರವನು ಹೊತ್ತು||ಪ||

ಕಾಳು ಕಾಳಿಗೂ ಸುರಿಸುತ್ತಿದೆ
ಹನಿ ಹನಿ ಬೆವರು
ಸಾಲು-ಸಾಲುಗಳಿಗೂ ಕೂಡ
ಕಟ್ಟಿದೆ ಬೆವರಿನಾ ಕಡಲು
ತುಂಬಿಸಲೆಂದು ಜಗದ ಒಡಲು ||1||

ಹಗ್ಗದ ಬಿಗಿಯಲ್ಲಿಯೇ ನೆಡೆಯುತ್ತಿದೆ
ಬದಿಯ ಒಳಗೆ
ಕಳೆಯ ಕಿತ್ತು ಹೆಂಟೆ ಹೊಡೆದು
ಸಸಿಗೆ ಸ್ಥಾನವನಿತ್ತು ||2||

ಚಾಟಿ ಏಟನು ಕೂಡ ಸಹಿಸಿದೆ
ಒಡೆಯನಾ ವರವೆಂದು
ಗೇಯುತ್ತಿದೆ ಹೊತ್ತು ಮರೆತು
ಜಗದ ಭಾರವನು ಅರಿತು.||3||

ಹೆಗಲು ಕೊರೆಯುತ್ತಿದೆ
ಮಂಡಿ ಬಾಗುತ್ತಿದೆ,
ಬೆನ್ನ ಚಕ್ಕಳಿಕೆ ಮೇಲೆಳುತ್ತಿದೆ
ಆದರೂ ಸಾಗುತ್ತಿದೆ ಎತ್ತು
ಜಗದ ಒಡಲ ಭಾರ ಹರಿತು.||4||
                                        ಪ್ರದೀಪ್.ಹೆಚ್.ಡಿ